Amfiteatri i Durrësit – nën vëmendjen e Europa Nostra

Amfiteatri i Durrësit – nën vëmendjen e Europa Nostra
Në kuadër të Ditës Ndërkombëtare të Monumenteve dhe Siteve të Trashëgimisë Kulturore, Europa Nostra – zëri i Trashëgimisë Kulturore pranë Këshillit të Europës, ka prezantuar listën e shkurtër të 14 objekteve të trashëgimisë europiane në rrezik, një program sensibilizues që targeton publikun e gjerë dhe institucione të rëndësishme finaciare të Bashkimit Europian. Në këtë listë është përfshirë dhe Amfiteatri i Durrësit si një monument i rëndësishëm dhe me vlerë për trashëgiminë europiane.
Programi “The 7 Most Endagared” – “7 Më të Rrezikuarit” është një formë e re ndërgjegjësimi publik që Europa Nostra ka zgjedhur për të inkurujuar dhe mbështetur organizatat anëtare të saj, qe të prezantojnë objekte të trashëgimisë të vendeve të tyre, të cilat kanë nevojë për më shumë vëmendje.
“Më këtë program inkurajues, Europa Nostra nuk synon vetëm identifikimin e monumenteve në risk të trashëgimisë kulturore në Europë, por bën thirrje për veprim. Grupe me ekspertë të fushave të ndryshme në bashkëpunim më partnerët tanë, do ti vizitojnë këto objekte të përzgjedhura, dhe do të kontribuojmë në gjetjen e zgjidhjeve të qëndrueshme dhe të mundshme për të ardhmen e tyre. Në këtë mënyrë, ne shpresojmë të frymëzojmë dhe inkurajojmë reagimin e organizmave publikë dhe privatë në Europë dhe jashtë saj”, shprehet Denis de Kergorlay, Presidenti Ekzekutiv i Europa Nostra.
Programi “The 7 Most Endagared” – “7 Më të Rrezikuarit” i prezantuar në Janar të këtij viti, u adresohej të gjitha organizatava dhe enteve publike anëtarë të Europa Nostra, të aplikojnë për objekte përfaqësuese të trashëgimisë kukturore të vendeve të tyre. Eksperienca pozitive e këtij programi të sukseshëm realizuar nga US National Trust for Historic Preservation (Organizata për Ruajtjen e Trashëgimisë Historike në Shtetet e Bashkuara), ishte burim frymëzimi dhe për Europa Nostra.
Kjo thirrje u vlerësua nga Shoqata për Zhvillimin e Turizmit Kulturor, e cila aplikoi duke përzgjedhur Amfiteatrin e Durrësit, si një nga monumentet më të rëndësishme të trashëgimisë kulturore Shqiptare dhe Europiane, me vlera te veçanta për zhvillimin e turizmit Kulturor.
Ekspertë të njohur të fushës, anëtarë të Bordit Këshillues Ndërkombëtar të Europa Nostra, kanë përzgjedhur 14 objekte të nominuara nga e gjithë Europa. Këto monumente përfaqësojnë qendra historike, zona arkeologjike, ndërtesa kulti dhe fortifikime të ndryshme. Ndërmjet 40 aplikimeve nga 21 vende të Europës, si Gjermani, Itali, Francë, Turqi, Qipro, Greqi etj., Amfiteatri i Durrësit eshte perzgjedhur në listën paraprake, për tu vlerësuar ne një fazë përfundimtare në muajt në vijim. Lista përfundimtare, do të shpallet me rastin e festimit të 50 vjetorit të Europa Nostra, në Kongresin e rradhës, i cili do të mbahet në Athinë në 16 Qershor 2013.
Amfiteatri i Durrësit është është një objekt unik me vlera të rralla arkitekturore, historike dhe turistike. Ende i pazbuluar tërësisht ky objekt emblemë e një civilizimi mijëvjecar dhe një memorie historike, shumë informuese për brezat, është pa dyshim motivi kryesor që i ka shtyrë, me sa duket, ekspertët ta përfshijnë atë në listën e 14 të nominuarve.
Ne shpresojmë që ky objekt të konsiderohet si i tillë deri në fund të përzgjedhjes, duke i dhënë kështu trashëgimisë Kulturore Shqiptare, vëmendjen e duhur në arealin e pasur të trashëgimisë kulturore europiane, që garanton komunikimin ndërmjet kombeve.
Europa Nostra, dhe anëtarët e saj e konsiderojnë ruajtjen e trashëgimisë kulturore një detyrë të rëndësishme dhe pa dyshim një përgjegjësi të përbashkët për të gjitha palët. Investimi në trashëgiminë nuk është një luks, por një kontribut për t’i dhënë jetë trashëgimisë kulturore europiane.
“Europa Nostra më shumë së kurrë ka nevojë për të qënë së bashku, sepse Trashëgimia e Europës është gjithcka, është fryma që e mban gjallë, si dhe shpirti që e përjetëson” shprehet i mirënjohuri Placido Domingo – President i Europa Nostra.
Shoqata për Zhvillimin e Turizmit Kulturor – ADCT është e angazhuar plotësisht të jetë jo vetëm aktive në këtë proces mbarëeuropian, por të mundësojë dialog dhe partneritet me institucionet publike dhe private brenda dhe jashtë vendit, për ta bërë të mundshëm realizimin e këtij misioni të vështirë në mbrojtje të trashëgimisë, dhe për ta njehsuar zërin tonë me atë të Europa Nostra, gjithmonë në funskion të trashëgimisë kulturore shqiptare.
Duke shpresur në mbështetjen dhe mirëkuptimin tuaj dhe atë publik, ju falenderojmë për vëmendjen.
Armada Molla
Kryetar
Shoqata për Zhvillimin e Turizmit Kulturor
Adresa: Rruga “Dora D’Istria”, Nd.5 H3,
Kodi Postar 1019,
Tirana – Albania