Ardian Prrenjasi Ndryshon Dëshmi: Nuk Kam Lidhje Me Zhdukjen E Julian Çelës

Ardian Prrenjasi ndryshon dëshmi: Nuk kam lidhje me zhdukjen e Julian Çelës

Gjetja e trupit të 11-vjeçarit Julian Çela duket se nuk do të ndodhë, duke qenë se i dyshuari për vrasjen dhe zhdukjen e tij, Ardian Prrenjasi, ka ndryshuar për të disatën herë dëshminë e vet.

Gjatë një takimi që ka pasur me të vëllanë, sipas gazetës “Panorama”, Prrenjasi e ka mohuar që të ketë lidhje me vrasjen dhe zhdukjen e Julianit.

“Nuk e kam vrarë unë Julian Çelën dhe nuk kam lidhje me zhdukjen e tij”, i ka thënë Prrenjasi të vëllait, ndërkohë që deri më tani kishte thënë të kundërtën.

Në rast se e mohon vrasjen dhe zhdukjen e 11-vjeçarit, Prrenjasi mund të dënohet vetëm për ngacmime seksuale, duke qenë se policia dhe prokuroria nuk kanë arritur dot të gjejnë prova për zhdukjen e Julian Çelës dhe kanë vetëm dëshminë e Prrenjasit, e cila tashmë ka ndryshuar.

Do e kërkojmë Julin derisa të gjejmë edhe një shenjë nga trupi i tij”. Kjo është e vetmja fjali që arrijnë të thonë të afërmit e 11-vjeçarit Julian Çela, i zhdukur prej disa muajsh. Të lodhur dhe tepër të shqetësuar, familjarët e vogëlushit nuk e kanë shumë të lehtë që të flasin pas momentit që Juliani nuk është kthyer më në shtëpinë e tij.

Familjarët e 11-vjeçarit vazhdojnë kërkimet që prej natës së 30 nëntorit, nata kur Juliani humbi kontaktet me familjen e tij, dhe që prej asaj dite kërkimet e tyre janë shtrirë në çdo rrugicë, jo vetëm të Tiranës, por të gjithë Shqipërisë. Por edhe pas një kërkimi intensiv nga familjarët, por edhe nga forcat e policisë, ende nuk ka asnjë shenjë nga Julian Çela.





10.06.2013

Burimi: Gazeta Tema