Irani paralajmëron Shqipërinë: “Pranuat muxhahedinët, tashmë jeni të kërcënuar!”

Irani nuk e ka kapërdirë dot faktin se Shqipëria i ofroi strehim 14 muxhahedinëve të cilët do të pasohen edhe nga afro 200 të tjerë. Anëtari i Bordit Kryesues i Parlamentit iranian Baqer Hosseini Seyed paralajmëroi Tiranën për prezencë të anëtarëve MKO dhe pranimi i këtyre njerëzve do të kërcënojë sigurinë kombëtare të Shqipërisë.
“Qeveria e Shqipërisë duhet të shmangë përsëritjen e të njëjtit gabim që kanë bërë vendet e tjera në lidhje me pritjen e anëtarëve të MKO, sepse këta njerëz janë të rrezikshëm edhe për sigurinë kombëtare të atij vendi dhe gjithë rajonit”, paralajmëroi Hosseini.

Organizata Mojahedin-e-Khalq konsiderohet si opozita politike e regjimit të Ahmadinexhadit në Iran. Janë afër tre mijë anëtarë të saj që prej vitesh ndodhen të strehuar në Irak ndërsa qeveria shqiptare është treguar e gatshme të ofrojë strehim për 210 muxhahedinë të cilët ndodhen në Kampin e “Liria” në Irak./alb-observer.com/