PSY s’vjen në Tiranë më 18 maj

Të gjithë fansat e grupit më të klikuar së fundmi në Youtube, PSY, kanë mbetur të zhgënjyer ditën e sotme. Ndërsa kishin blerë biletat për të shijuar performancën e artistit korean me famë botërore PSY, në datë 18 Maj në “Matrix Night Club” në Tiranë, sot mësuan se mbërritja e tij në kryeqytet është shtyrë.

Sipas një njoftimi që “Matrix Night Club” ka publikuar në rrjetin social “Facebook”, axhenda e ngarkuar e këngëtarit ka bërë që hapja e club-it të shtyhet për në datën 24 maj, ndërkaq nuk thuhet asgjë konkrete për datën kur PSY do të jetë Tiranë.

“Të dashur miq,
për shkak të një eventi të rëndësishëm në US, PSY ka shtyrë datat e Europës duke përfshirë këtu dhe datën në Shqiperi.
Si rrjedhojë dhe hapja do të shtyhet për datën 24 Maj!
Shumë shpejt do t’ju njoftojmë për datën e re të PSY në “Matrix Night Club”.
(Eventi i PSY është SHTYRE, jo anuluar)
Ju falemindërit për mirëkuptimin!”, thuhet në njoftim.

Ndërkaq nuk kanë munguar edhe komentet e fansave të zhgënjyer nga ky lajm. Shumë të rinj, pasi kanë parë posterat e vendosur në rrugët e kryeqytetit, spotin prezantues në youtube, e deri në mediat online, kanë nxituar të blejnë biletën dhe të bëjnë rezervimet.

Disa ditë më parë “Shqiptarja.com” dhe Tv “A1 Report” kontaktuan organizatorët e “Matrix Club” në numrin e rezervimeve të prezantuar në faqen e “Facebook”, të cilët konfirmuan axhendën e Gangnam Style-it në Tiranë, si dhe kontrolluan portalin e tureve të këngëtarit, por aty nuk kishte asgjë konkrete. Kjo bëri që të vihej në pikëpyetja, ardhja apo jo e PSY në Tiranë.

Në portalin e tureve të këngëtarit PSY në www.songkick.com, si event i konfirmuar në pritje ëshë ai i planifikuar më datë 9 qershor të këtij viti në stadiumin e Ëemblit në Londër dhe eventi i cili është realizuar më datë 16 prill në Indianapolis në Ball State University, por për prezencën e tij në Tiranë nuk shkruhet ende asnjë e dhënë!

E ndërkaq, s’na mbetet gjë tjetër, veçse të presim nëse këngëtari i njohur korean do të vijë apo jo në Shqipëri.