Vrau 14-vjeçarin për sherrin në lojën e internetit, lihet në burg

DURRES – “Nuk doja ta vrisja, por thjesht ta trembja”. Kështu deklaroi dje në Gjykatën e Durrësit 17-vjeçari Xhulio Leka gjatë seancës ku do të vlerësohej masa e sigurisë. Të hënën qëlloi me thikë për vdekje 14-vjeçarin Fatos Daçi pas një sherri në internet për lojën. Gjykata e vlerësoi si të ligjshëm arrestimin e adoleshentit, gjimnazist në vitin e tretë, dhe vendosi masën e sigurisë arrest me burg. Ai akuzohet për vrasje me paramendim, krim që ndodhi në Lagjen Nr. 13, pranë sektorit “Iliria”. Organi i akuzës që përfaqësohej nga prokurorja Enkeleida Xhengo, i cilësoi të mjaftueshme provat që implikojnë të arrestuarin si autor të vrasjes me paramendim të 14-vjeçarit Daçi dhe kërkoi të lihej në burg, kërkesë e cila u mor parasysh nga gjykata. Kërkesa e prokurores nuk pati kundërshtime as nga avokati mbrojtës, por ky i fundit deklaroi se ngjarja ka ndodhur pas një konflikti banal mes dy të rinjve dhe se Xhulio Leka nuk ka pasur si qëllim vrasjen e 14-vjeçarit, por thjesht për ta frikësuar atë. Vetë autori mësohet si i ka qëndruar deklaratës së dhënë në polici, duke u shprehur përpara togave të zeza se pak minuta përpara se të kryente vrasjen kishte debatuar me viktimën në një pikë interneti, ndërsa më pas kishte shkuar për të marrë një thikë dhe e ka pritur në mes të lagjes. “Nuk doja ta vrisja, por ta trembja. Fatosi ishte me një shok të tij dhe nuk mund t’iu afrohesha pa thikë. E qëllova një herë në gjoks, por pa dashur ta godisja në zemër”, ka pohuar 17-vjeçari./panorama