Aida Shtino: Arsyet pse pranova ofertën e PDIU

Aida Shtino, drejtuesja e emisionit “Njerëz të Humbur”, tregon në këtë intervistë për “Gazeta Shqiptare” arsyet e kandidimit të saj me PDIU në Qarkun e Lezhës, në zgjedhjet e 23 qershorit… Çfarë e shtyu Shtinon ta pranonte ftesën dhe kauza për të cilën ajo lufton…

Pse vendosët të kandidonit?
Kam pasur shumë oferta deri tani, por gjithmonë i kam refuzuar sepse nuk e kam gjetur veten në programin e asnjë partie. Por së fundmi, duke pasur parasysh çështjen që ka në fokus partia ku aderoj, PDIU, që është çështja kombëtare e pashë të arsyeshëm angazhimin tim në politikë. Pas Kosovës tani e ka rradhën pavarësia e Çamërisë. Gjatë gjithë këtyre viteve që drejtoj emisionin “Njerëz të Humbur”, përveç gjetjes së njerëzve kam bërë apel për rikthimin e ndërgjegjes qytetare e cila mendoj se është shumë e rëndësishme për arritjen e një rezultati final…
Kush ua bëri propozimin?
Vetë kryetari i PDIU, z.Shpëtim Idrizi.
A do të bëni fushatë?
Unë jam e re në politikë, por do të luftoj shumë që të jem zëri i familjarëve të të humburve dhe i vetë atyre në Parlamentin Shqiptar. Ka ardhur momenti që të humburit në Shqipëri, ashtu si në të gjithë botën, të përfaqësohen nga një institucion, që ndihmon në gjetjen e tyre.
A do ta ndërprisni emisionin tani që iu futët politikës?
Jo, nuk kam arsye. “Njerëz të Humbur” do të vazhdojë, pasi është fija e vetme e shpresës për familjarët e të humburve./balkanscreen.info