Shuhet “gruaja e 10 presidentëve” .

Mediat e quajtën gruaja e 10 presidentëve, nga John Kennedy e deri te Barack Obama. Helen Thomas do të kujtohet si gazetarja legjendare e Shtëpisë së Bardhë, e cila, përgjatë gati 5 dekadash, qëndroi përballë 10 shefave të Shtëpisë së Bardhë.

92-vjeçarja ndërroi jetë, pas një sëmundjeje të gjatë. Për 49 vjet, Thomas punoi për “United Press International” dhe më pas si editorialiste e gazetës “Hearst”.

Ngjarjet në Shtëpinë e Bardhë ishin pasioni i saj, që prej kohës kur nisi të interesohej për figurën e Jacqueline Kennedy Onassis. Ishte e vetmja gazetare, që kishte një karrige me emrin e saj, në sallën e konferencave për shtyp të presidentit.

Nga kolegët kujtohet për pyetjet e sakta, që u drejtonte presidentëve në detyrë. E lindur në Detroit, nga një familje emigrantësh libanezë, ishte dhe gruaja e parë, anëtare e “National Press Club”, e shoqatës së korrespondentëve të Shtëpisë së Bardhë, dhe e para grua anëtare e klubit “Gridiron”, shoqata më prestigjioze e gazetarëve të Washington DC.

Thomas shkroi disa libra. Ajo u tërhoq në qershor të 2010-s, pas disa komenteve për konfliktin izraelito-palestinez, që ndezën kritika të ashpra kundër saj, madje e detyruan të braktisë editorialet e Herst.

Më pas kërkoi ndjesë, duke thënë se ajo që kishte thënë nuk reflektonte besimin e saj për atë që duhet të ishte, paqja në Lindjen e Mesme.



24.07.2013

Burimi: Ikub