Automjeti përplas një 13-vjeçar, djali në koma prej 4 orësh

Një 13-vjeçar ndodhet në gjendje kome prej 4 orësh, pasi është përplasur nga një automjet teksa udhëtonte me biçikletë. Ngjarja ka ndodhur mesditën e sotme, në Shijak, ku 13-vjeçari është përplasur nga një automjet që udhëtonte me shpejtësi.
Menjëherë drejtuesi i automjetit e ka transportuar djalin në spitalin e Durrësit, prej ku mësohet se djali është në gjendje tepër të rëndë. Mjekët e këtij spitali kanë kërkuar transportimin e tij në Spitalin Ushtarak në Tiranë, apo në ndonjë spital privat më të specializuar, por kjo është shumë e vështirë, pasi nevojitet një auto-ambulancë me respiratorë, apo një helikopter i posaçëm.
Ndërkohë, familjarët i bëjnë apel ministrit të Shëndetësisë Halim Kosova për të bërë të mundur transportimin e djalit në një spital të specializuar, në mënyrë që ai të mbijetojë.
 
Ndërsa Kosova tha se në Durrës ka mbërritur edhe ekipi me mjekët neurokirurgë nga Tirana, të cilët mungonin. Ndërsa në lidhje me mungesën e barnave në këtë spital, Kosova u shpreh se po bëhet gjithçka që të mos mungojë asgjë që do t’i vinte në ndihmë shpëtimit të jetës së djalit të aksidentuar.