Identifikohen 4 viktimat e aksidentit tragjik, nënë e bijë dhe një çift bashkëshortësh

Policia ka bërë të mundur identifikimin e 4 viktimave të aksidentit tragjik që ndodhi pasditen e së hënës në aksin Elbasan-Librazhd. Policia njoftoi se 2 prej të vdekurve nga përplasja fatale janë çifti i bashkeshorteve, Fetah Cela 50 vjeç dhe Ryfete Cela, 48-vjeçe. Ndersa dy viktimat e tjera jane Nasibe Shehi, 69 vjeç dhe Alushe Kullafi, 49 vjeç, nënë e bijë.
Mësohet se punonjësve të zjarrfikësve u janë dashur më shumë se një orë që të nxjerrin trupat e viktimave nga furgoni. Viktimat e para që u identifikuan disa orë më pas ishin Fetah Cela, 50 vjeç, si edhe bashkëshortja e tij Ryfete Cela 48 vjeçe. Sipas të afërmve bashkëshortët Çela kishin pak ditë që kishin ardhur nga Greqia, dhe shtëpinë e tyre e kishin në Elbasan.
 
Pak më vonë janë identifikuar edhe dy viktimat e tjera që rezultoi të ishin nënë e bijë, Nasibe Sheh,i 69 vjeç dhe vajza e saj Alushe Kullafi ,49 vjeçe që të dyja me banim në fshatin Katund i Ri në qytetin e Elbasanit. Të dyja, nënë e bijë kishin shkuar në Librazhd për një vizitë tek të afërmit e tyre.
 
Ndërkohë, drejtuesi i furgonit, Eduart Haskurtin, njihej nga banorët e zonës si një nga shoferët më të mirë dhe kishin udhëtuar shpesh me të. Drejtuesi i mjetit furgon, sipas hetimeve të para të Policisë është aksidentuar pasi ka dashur të devijojë aksidentin. Ai është dërguar në spitalin Ushtarak të Tiranës për të marrë një ndihmë të specializuar pasi gjendja e tij shëndetësore është shumë e rëndë.