Itali, vajza shqiptare e hedhur ne qesen e plehrave po lufton me jeten, gra e burra proteste para spitalit

Vajza 24-vjeçare, Xhuli Toska, e cila u gjet e hedhur në plehra në Itali, ndodhet në gjendje të rëndë në spital. Një javë më parë, 24-vjeçarja shqiptare, Xhuli Toska është rrahur mizorisht me shpulla e shkelma nga 28-vjeçari Emerson D’Esposito, tashmë i arrestuar. Policia bën të ditur se kanë qenë fqinjët ata që kanë dëgjuar rënkimet dhe kanë parë qesen e plehrave të lëvizë dhe menjëherë kanë dhënë alarmin.
Sipas mediave italiane, 24 vjeçarja ka marrë dëmtime të rënda në mushkëri dhe në shpretkë, lëndime të brendshme, plagë e trauma të shumta në kokë dhe në trup. Ajo ndodhet në spitalin Loreto Mare të Napolit në gjendje kome farmakologjike, mjekët e mbajnë nën kontroll të vazhdueshëm dhe e konsiderojnë gjendjen e saj “të qëndrueshme, por shumë të rëndë”.
 
Përpara spitalit, ku ndodhet Xhuli Toska nga Berati, janë mbledhur gra e burra për të protestuar kundër dhunës ndaj gruas dhe në disa nga parullat lexohej:” I pari shans i barabartë për një grua është të mos i merret jeta”, “Burrat e dhunshëm nuk duhen kuptuar, por duhen dënuar”.
Policia e Napolit ka arrestuar Emerson D’Esposito rreth 24 orë pas agresionit. Ai akuzohet për tentativë vrasjeje dhe mbajtje armësh pa leje.
Sipas policisë së Napolit, autori ngjarjes ka rrëfyer se e ka rrahur 24-vjeçaren në sy të vajzës së saj 4-vjeçare dhe të një djali 3-vjeçar, që ishte i të fejuarës së D’Espositos, e cila jetonte me vajzën shqiptare.
I pyetur mbi shkakun e agresionit, D’Esposito ka treguar se ka qenë një grindje e lindur mes tij dhe Toskës, sepse kjo e fundit nuk pranonte që ky të nxirrte nga xhiroja e prostitucionit të dashurën e tij.
Ndërkohë, policia italiane po vazhdon hetimet për të zbardhur ngjarje.