Spastrohet edhe ushtria: Nishani shkarkon gjeneralin që u propozua nga Kadare për president

Me anë të një dekreti të datës 21 maj, presidenti Bujar Nishani ka urdhëruar shkarkimin nga detyra të gjeneral Sandër Lleshit i cili rreth një vit më parë ishte propozuar nga shkrimtari i njohur Ismail Kadare për president. Sipas mediave që kanë bërë public dekretin, ai ka vetëm dy rreshta dhe në të nuk ka asnjë argument se përse shkarkohet nga detyra e zv/shefit të Shtabit të Përgjithshëm të Forcave të Armatosura. Mësohet se gjenerali ka marrë dekretin e shkarkimit të tij thuajse në rrugë informale, kurse në faqen zyrtare të presidencës është e pamundur të gjesh dekretin që shkarkon zyrtarin e lartë të Ministrisë së Mbrojtjes. Vetë gjenerali thotë se është ndjerë i çuditur mbi dekretin që urdhëron shkarkimin e tij: “ E vërteta është se më ketë dekret unë jam njohur në mënyrë jozyrtare, thuajse në rrugë informale. Nuk di ç’të them. Jam krejtësisht i habitur për sa ka ndodhur. Në të nuk ka asnjë argument përse për lirojnë nga funksionet e mia në Ministrinë e Mbrojtjes”/alb-observer.com/