Borxhet, vetëvaret pasi telefonoi gruan

FIER – Borxhet çojnë drejt vetëflijimit një 37- vjeçar, baba i dy fëmijëve. Pasi vuri në dijeni të shoqen se do të vriste veten pasi nuk mund të përballonte dot më stresin e borxheve, Pilo Çorape nga Fieri i ka dhënë fund jetës duke u vetëvarur në pyllin e Semanit. “Një 37-vjeçar gjendet i vetëvarur në pyllin e Semanit, në Fier. Viktima është Pilo Çorape. Nga hetimet paraprake mësohet se viktima para aktit ekstrem kishte telefonuar gruan dhe i kishte thënë se do vriste veten për shkak se nuk lante dot borxhet”, bënë të ditur burime nga Policia e Fierit. Mësohet se viktima dhe e shoqja punonin si shitës ambulantë në Fier apo rrethinat e saj. Por kryefamiljari ishte detyruar herë pas here të hynte në borxhe, pasi fitimet ishin të pakta dhe ata nuk kishin asnjë të ardhur tjetër. Bashkëshortja e tij kishte lajmëruar policinë mbrëmë, pasi i shoqi e kishte telefonuar dhe i kishte bërë të ditur vendimin që kishte marrë. Ai nuk është kthyer gjatë gjithë natës në shtëpi, ndërsa trupi i tij është gjetur pasi policia është sinjalizuar për një trup të vetëvarur në pyllin me pisha të Semanit. Viktima la pas dy jetime në moshë të mitur. m.r
/panorama