Italianët e antidrogës: Lazarati prodhon 900 ton

nga **♛Melody♛** Wed Aug 07, 2013 5:52 am

Hashashi që kultivohet nëpër zonat e ndryshme të vednit tonë mbledh në Tiranë tryezën për të demonstruar shifrat e prodhimit dhe të fitimit. Sipas llogarive të bëra publike ditën e djeshme mësohet se 4.5 miliardë euro llogaritet xhiroja vjetore e hashashit të prodhuar vetëm në Lazarat. Ky shat mbahet si kryeqendra e kësaj bime të kushtueshme, ndonëse jo sa lëndët që shpeshherë kapërcejnë nëpërmjet vendit tonë për në Perëndim. Kur bëhet fjalë për trafikim të Heroinës dhe të Kokainës, shifrat janë shumë herë më të larta, paçka se policia jonë viteve të fundit ka raportuar se është goditur jo pak ky trafik. Në hartën e kultivimit të hashashit thuajse është i përfshirë gjithë vendi, por pas Lazaratit, Vlora dhe Shkodra kryesojnë top listën. Italianët e anti-mafias prej vitesh kanë dhënë asistencën e tyre në fotografimin e të gjithë hapësirës së kultivimit për të bërë më të lehtë identifikimin e parcelave, por si do që shqiptarët e kanë të vështirë të heqin dorë nga një punë mjaft fitimprurëse. Në një konferencë të përbashkët për shtyp të kreut të Aviacionit të Guardia di Finanza, Stefano Bastoni dhe kreut të Policisë së Shtetit, Hysni Burgaj. Italiani ka nisur të bëjë llogaritë e prodhimit të brendshëm ekonomik të vendit tonë dhe përllogaritjet e tij e konsideronin prodhimin e hashashit si 50 përqindëshin e këtij prodhimi vendas.
Harta e kultivimit
Vlora, Gjirokastra dhe Shkodra janë prefekturat ku lulëzon ende kanabisi. Ky konstatim u bë gjatë një konference të përbashkët të drejtorit të Policisë së Shtetit, z Hysni Burgaj me Drejtorin e Repartit të Aviacionit të Guardia Di Finanza, Stefano Bastonin si dhe me Zv/Ambasadorin Italian në Shqipëri, Giuseppe Berlendi. Ne konference u evidentua ndihma qe policia italiane dha në identifikimin e plantacioneve me kanabis në Shqipëri. Kjo u arrit ne sajë të avionëve të specializuar në teknologji për këtë qëllim. Siç theksoi Bastoni, policia italiane është e shqetësuar sepse kanabisi që kultivohet në Shqipëri tregtohet masivisht në Itali. “Avionë me teknologji të përparuar fluturuan dhe zbuluan qindra plantacione me kanabis, lëndë narkotike që më pas masivisht trafikohet në Itali”. Drejtori i Repartit të Aviacionit të Guardia Di Finanza, Stefano Bastoni vlerësoi bashkëpunimin me policinë shqiptare gjatë operacionit të monitorimit nga ajri të parcelave me lëndë narkotike. Në fjalën e tij, Bastoni theksoi se një nga zonat më problematike për kultivimin e kanabisit mbetet Lazarati ku sipas tij lënda narkotike mund të arrijë në 900 tonë ndërsa nga vlera e shitjes së saj mund të përfitohet 4.5 miliard euro. “Kemi bërë fotografi nga lartësia që dëshmojnë realitetin në Lazarat si kurrë më parë”.
Kryepolici Burgaj
Ndërsa e cilësoi luftën kundër kultivimit të lëndëve narkotike, si një nga prioritet kryesore të policisë së shtetit, Burgaj theksoi se me rëndësi është ç`rrënjosja e këtij fenomeni dhe dalja e Shqipërisë nga harta e vendeve kultivuese të drogës. “Autorët në shumë raste janë shpërngulur nga vendbanimet e tyre. Janë asgjësuar 108 raste dhe janë proceduar 33 shtetas; 23 janë arrestuar dhe të tjerë janë në kërkim. Në këtë operacion, policia ka angazhuar forca të specializuara të mbështetura nga helikopterë. Kontrolli dhe krehja e zonave do vazhdojnë deri në shtator së bashku me asgjësimin e parcelave. Lufta kundër kultivimit të bimëve narkotike do të vazhdojë deri në heqjen e plotë të Shqipërisë nga harta e kultivimit të tyre” shtoi Burgaj. "Nga filmimet ajrore është bërë i mundur fotografimi i të gjitha parcelave në vend dhe zonat më problematike janë Vlora, Shkodra, Gjirokastra, Tirana dhe Durrësi. Kemi të bëjmë kryesisht me sipërfaqe të vogla, larg zonave të banimit dhe në zona të thella malore” tha me tej Burgaj.