Policia greke vret dy të arratisurit shqiptarë nga burgu i Trikallës

Dy prej të arratisurve shqiptarë janë vrarë nga policia greke gjatë një operacioni për arrestimin e tyre. Ngjarja ka ndodhur në zonën Koniska të prefekturës së Etoloakarnanias, rreth orës dhjetë të mbrëmjes së të martës.
Forca të shumta policore greke kishin ngritur prita të ndryshme në këtë zonë, pasi kishin zbuluar me kamera termike se aty fshiheshin pesë prej të burgosurve shqiptarë që ishin arratisur nga burgu i Trikallës. Mësohet se dy shtetasit shqiptarë po lëviznin në këmbë dhe në momentin që u është kërkuar të dorëzoheshin, ata nuk kanë pranuar dhe kanë hapur zjarr me kallashnikovë.
Gjatë të shtënave të forcave policore, dy shqiptarët Edison Lika dhe Admir Nikaj( Murataj/Xhaferri) janë vrarë, por policia nuk ka konfirmuar zyrtarisht vrasjen e tyre. Ndërkohë, vazhdojnë kërkimet për tre të arratisurit e tjerë, midis të cilëve ndodhet edhe i shumëkërkuari i policisë Marian Kola.