Arvizu i përgjigjet prerë Berishës për vizat

Një temë tjetër e prekur nga ambasadori amerikan Arvizu, kanë qenë vizat. Në mënyrë të prerë dhe shumë qartë, Arvizu tha se Shqipëria nuk është përgatitur për liberalizimin e vizave me SHBA-të.

“Ka disa kritere që e bëjnë një vend të vlefshëm për programin e liberalizimit të vizave dhe një prej tyre është niveli i refuzimit të vizave, që duhet të jetë nën 3%. Vitin e shkuar kalendarik, niveli i refuzimit të shqiptarëve ka qenë 40.5% dhe nëse do shihni, vitet e fundit, s’ka qenë nën 30% dhe s’ka shkuar mbi 45%. Pra, një staticien mund të më thotë se cili është probabiliteti. Faktet janë fakte. Diçka tjetër që mund ta bazoj këtë është se ne nuk negociojmë si me BE-në. Ndoshta ju si shqiptarë jeni mësuar që çdo 6 muaj, vjen një nga Brukseli e ju thotë se keni bërë përparime etj. etj. Por, nuk ka negociata, nuk ka një raportim të statusit; pra, ose kualifikohesh ose nuk kualifikohesh. Ju nuk jeni gati!”, nënvizoi Arvizu.

Berisha: Heqim vizat me SHBA-të

Në takimin e sotëm në Vorë, kryeministri Berisha akuzoi sërisht opozitën se po bllokon procesin e nisur të liberalizimit të vizave më SHBA-të.

“Shoku i autobusit na pengoi 1 vit por më në fund u dorëzua, ne do marrim statusin, do hapim negociatat me BE, do bëjmë gjithçka për të liberalizuar vizat me SHBA”-tha Berisha në Vorë.

/Shekulli Online/Përgatiti: E.Sh/