Merrnin shtëpi me qira, grabisnin fqinjët

Tiranë, grupi prej 5 të rinjsh u zbulua pasi i vodhën kasafortën një funksionari të Bashkisë së Ballshit. Autorët plaçkitën edhe shtëpinë e gazetares Briseida Mema.
Një grup prej 5 të rinjsh, mes të cilëve edhe një vajzë 26- vjeçare, u arrestua dje gjatë një aksioni të Policisë së Tiranës, pasi dyshohen të jenë autorë të vjedhjes së dhjetëra banesave në kryeqytet, Durrës dhe Fier. Duke u prezantuar si studentë që kërkonin shtëpi me qira në Tiranë, të rinjtë studionin fillimisht banesën e fqinjit përballë apartamentit ku do jetonin, që ishte edhe synimi i tyre kryesor për ta grabitur.

Gazetarja Briseida Mema
Në rast se komshinjtë, në dukje, u rezultonin të pasur, atëherë ata binin dakord për të jetuar vetëm disa orë përballë tij dhe menjëherë sapo realizonin grabitjen, largoheshin nga apartamenti i marrë me qira, pa paguar as paratë. “Viktimë” e skemës së tyre të plaçkitjes ka rënë edhe gazetarja e njohur Briseida Mema. Vetëm disa ditë më parë, më 16 maj, ajo kishte denoncuar në Komisariatin Nr.2 thyerjen e derës së apartamentit të saj në rrugën “Muhamet Gjollesha” dhe vjedhjen e disa bizhuterive, varëse e ora floriri, me vlerë rreth 50 mijë lekë të rinj. Gjithashtu, edhe një funksionar i Bashkisë së Ballshit, me detyrë shef kuadri, të cilit i kanë vjedhur kasafortën, në pamundësi për ta hapur që të merrnin paratë.
Madje, nisur nga kjo ngjarje, e ndodhur të enjten në Rrugën e Kavajës në Tiranë, Policia arriti të identifikojë autorët dhe të realizojë operacionin e koduar “Glob”. Sipas burimeve nga grupi hetimor, të rinjtë i vidhnin banesat përballë apartamentit ku banonin, duke u thyer fishekun e bravës, pasi siguroheshin që nuk kishte njeri brenda në shtëpi.
Te arrestuarit
• Juxhin Artur Gremi, 22 vjeç
• Ertida Marsi Marini, 26 vjeçe
• Aurel Siku Marini, 27 vjeç
• Ardit Astrit Bektashi, 23 vjeç
• Erold Roland Zguro, 21 vjeç
(Lajmin e plote nga Etleva Delia e lexoni sot ne Panorama)