Microsoft ndërton telefona që kuptojnë gjendjen tuaj emocionale

Një tjetër risi teknologjike po sillet nga kompania Microsoft, e cila po punon me zhvillimin e një teknologjie smartfonësh, të cilët do të arrijnë të kuptojnë gjendjen tuaj të humorit dhe më pas do e shpërndajnë tek miqtë tuaj në rrjetet sociale.
Kompania po eksperimenton me “sensorët e gjendjes emocionale” të cilët mund të kuptojnë sesi ndiheni, këtë informacion e bën me dije një artikull kërkimor Microsoft Research në Azi. Kjo teknologji, e quajtur MoodScope – do t’i mundësonte përdoruesve të shpërndajnë gjendjen e tyre emocionale me miqtë në kohë reale në rrjete sociale si Facebook-u, etj.
Këta sensorë do të masin gjendjen mendore të përdoruesve duke i klasifikuar ata në gjendjen e tensionuar, të lumtur, të mërzitur, të acaruar, të qetë, të stresuar apo të ekzaltuar. Sipas Microsoft-it, kjo teknologji do t’i ndihmonte njerëzit që ndodhen rreth jush të dinë gjendjen tuaj emocionale para se të flisni me ta, njësoj si të pasurit e avantazheve kur dini se shefi juaj është i nevrikosur.
Sipas raportit, Microsoft-i ka ndërtuar tashmë një prototip i cili tregon me rreth 66% saktësi gjendjen emocionale. Në një studim me 32 pjesëmarrës, niveli i saktësisë arriti në 95% pas dy muajve trajnimesh.
Sipas kompanisë, edhe shërbimet e tjera mund të përfitojnë nga kjo teknologji. Për shembull, ofruesit e muzikës si Netflix ose Spotify mund t’u sugjerojnë përdoruesve këngë më të përshtatshme bazuar në gjendjen e tyre emocionale.