Gërdeci, Ylli Pinari kërkon ulje dënimi

TIRANE – Ylli Pinari, ish-kreu i ndërmarrjes “MEICO”, një nga të dënuarit dosjes “Gërdeci”, kërkon ulje dënimi në Gjykatën e Tiranës. Kërkesa e të dënuarit me 10 vjet burg me një vendim të formës së prerë për akuzën e “shkeljes së rregullave mbi lëndët plasëse, djegëse dhe radioaktive” dhe për “shpërdorim të detyrës” është depozituar më 20 maj 2013 në kryesekretarinë e Gjykatës së kryeqytetit. Burime pranë Gjykatës bënë të ditur se përmes saj, Pinari kërkon 90 ditë ulje dënimi për shkak të problemeve shëndetësore dhe nevojës për kurim. Kërkesa në fjalë pritet të shqyrtohet ditët në vijim nga gjyqtari Petrit Çomo. Problemet shëndetësore të Ylli Pinarit janë evidentuar edhe më herët, gjatë gjykimit të tij në Shkallën e Parë. Disa herë ai ka shprehur pamundësi për të qëndruar në seancë për shkak të problemeve shëndetësore. Aktualisht ish-kreu i MEICO-s është duke vuajtur dënimin në Burgun e Vaqarit. Më 12 mars 2012, si një ndër të pandehurit kryesorë të dosjes “Gërdeci”, i pandehuri Pinari u dënua me 18 vjet burg. Në përfundim të shqyrtimit të dosjes në Apel, ai u dënua me 15 vjet burg, dënim të cilit iu ul edhe një e treta për shkak të pranimit të kërkesës për gjykim të shkurtuar./panorama