Anti-futbolli rishfaqet në Vlorë

nga **♛Melody♛** Mon Sep 16, 2013 10:10 pm

Flamurtari mund 2-1 Skënderbeun, por ndeshja u ndërpre 30 minuta pas grushteve ndaj presidentit të korçarëve
Ermal Kuka

Anti-futbolli rishfaqet në Vlorë Flamurtari-skenderbeu_1-320x180

Flamurtari ka mundur 2-1 Skënderbeun në javën e dytë të Kategorisë Superiore dhe ka marrë i vetëm kreun e klasifikimit. Por fatkeqësisht për skuadrën vlonjate, që ka kaluar shumë telashe gjatë kësaj vere, pakkush do të kujtojë nga kjo ndeshje gjestet teknike të lojtarëve të saj përballë kampionëve të Shqipërisë. Shkak është bërë incidenti i minutës së 37-të të ndeshjes, kur një tifoz në tribunën VIP ka goditur me grusht presidentin e Skënderbeut, Ardian Takaj.
Deri në ato momente, ndonëse në një atmosferë të ndezur nga tifozeria vlonjate e shumtë në numër në stadiumin “Flamurtari”, ndeshja kishte vijuar e qetë dhe vendasit kishin kaluar në avantazh në minutën e 20-të me anë të Shehajt. Por më pas, një tifoz ka filluar një zënkë në tribunën VIP, situatë që ka përfunduar me goditjen ndaj presidentit të korçarëve. Pas kësaj ngjarjeje, drejtuesit e Skënderbeut kanë tërhequr skuadrën nga fusha e lojës, duke hyrë në ambientet e brendshme të stadiumit, ku kanë qëndruar për rreth 30 minuta, para rikthimit në fushë për të vijuar ndeshjen, ndërsa Takaj është larguar bashkë me shoqëruesit e tij drejt kryeqytetit. Policia ka marrë në shoqërim personin përgjegjës për këtë ngjarje, por forcat blu janë kritikuar ashpër edhe nga kryebashkiaku vlonjat, Shpëtim Gjika, i cili i ka akuzuar se ata e kanë toleruar në tribunë këtë person, që në fillimin e kësaj ndeshjeje kishte fyer edhe drejtuesit vlonjatë.
Ndërkohë, pas rifillimit të takimit, Skënderbeu gjeti menjëherë golin e barazimit, me anë të Muzakës, një nga lojtarët që u largua nga Vlora pas vendimit të drejtuesve të klubit për të shkurtuar shpenzimet. Në pjesën e dytë, ishin kampionët e Shqipërisë në fuqi që krijuan rastet më të mira për të shënuar, por Abazi, Muzaka apo Ribaj kanë humbur raste të njëpasnjëshme para portës. Atëherë kur dukej se ekipet do të kënaqeshin me një barazim, në minutën e 89-të, pas një kundërsulmi të shpejtë, Begaj ka gjetur golin e fitores, duke i dhënë tri pikë morali skuadrës së tij. Gjithsesi, ngjarja e ndodhur jashtë fushës së lojës pritet të sjellë pasoja të rënda për vlonjatët, pasi do të kalojë në komisionet e FSHF-së nga ku pritet të marrin një ndëshkim të rëndë.
Një tjetër ndeshje e përfunduar me shumë tension ka qenë ajo mes Besës dhe Teutës, e mbyllur me rezultatin 2-2. Kavajasit kanë shënuar dy herë me Ditën e Sefën, por në 20 minutat e fundit, Teuta ka arritur të rivendosë baraspeshën, falë dy penalltive të realizuara nga Tefik Osmani. Penalltia e dytë, e dhënë në shtesën e ndeshjes nga gjyqtari Edvin Hoxha, ka tensionuar shumë situatën, me ekipin vendas që ka akuzuar kryesorin për gjykim të njëanshëm në favor të skuadrës durrsake.
Tirana, një skuadër që e ka nisur këtë sezon mes shumë problemeve, ka arritur të sigurojë fitoren e parë të sezonit me suksesin minimal 1-0 ndaj Lushnjës. Në ndeshjen e luajtur në stadiumin “Qemal Stafa”, bardhebluve u ka mjaftuar penalltia e Muçës në pjesën e parë për të marrë tri pikë shumë të vlefshme në këtë fazë ku ata janë ende në kërkim të “identitetit” falë eksperimenteve në formacion. Ndonëse miqtë kanë kërkuar me ngulm barazimin falë tentativave të Fatakit e Çankës, nuk kanë arritur të përsërisin surprizën e javës së parë përballë Kukësit.

Kategoria Superiore
Java 2 / Rezultatet
Të shtunën
Laçi-Partizani 1-0
73’ Tanushi
Bylis-Kastrioti 1-0
67’ Izuçukuka
Kukësi-Vllaznia 1-3
55’ Progni / 47’ Bushiç, 74’, 85’ Kruja
Dje
Besa-Teuta 2-2
12’ Dita, 61’ Sefa / 70’ (p), 90’+6’ (p) Osmani
Tirana-Lushnja 1-0
29’ (p) G. Muça
Flamurtari-Skënderbeu 2-1
20’ A. Shehaj, 89’ Begaj / 39’ Muzaka
Renditja
Flamurtari 6 pikë, Teuta 4, Laçi 4, Tirana 4, Vllaznia 3, Partizani 3, Bylis 3, Skënderbeu 3, Lushnja 3, Besa 1, Kukësi 0, Kastrioti 0.