SHBA, arrestohen 255 persona, akuzohen për pedofili me të mitur në internet

Rreth 255 persona janë arrestuar në Shtetet e Bashkuara si edhe në tetë shtete të tjera, pasi akuzohen për pedofili.
Autoritetet amerikane bënë të ditur se shumica e të dyshuarëve janë arrestuar në SHBA, por arrestime të tjera ka pasur edhe në Brazil, Kanada, Izrael, Meksiko, Tajlandë, Filipine, Singapor si dhe në Korenë e Jugut.
Drejtori i forcave të emigracionit dhe doganave, John Morton tha se “Operacion Gardian” kishte në qendër njerëzit e përfshirë në abuzimin seksual të të miturve në internet, si dhe kundër njerëzve që posedojnë, prodhojnë apo këmbejnë video pornografike të fëmijëve.
Morton tha në një deklaratë për mediat se 61 fëmijë, viktima të abuzimit seksual, janë shpëtuar gjatë këtij aksioni. Sipas tij, 17 të arrestuar mbanin pozita të privilegjuara në shoqëri, duke thënë se shtatë prej tyre ishin mësues dhe tre klerikë.