Sot Festa E Fitores Së PS, Rama Fton Nanon, Berishën Dhe Topin, Jo Arben Malajn

nga **♛Melody♛** Tue Jul 02, 2013 3:05 am

Sot festa e fitores së PS, Rama fton Nanon, Berishën dhe Topin, jo Arben Malajn
“Dy gëzime në një ditë” për socialistët. Ata do të festojnë sot, në një pritje madhështore, edhe fitoren e zgjedhjeve të 23 qershorit, edhe 22-vjetorin e themelimit të partisë. Festa për këtë të dytën u shty në 12 qershor, për t’u bashkuar me festën e fitores, të cilën kreu i PS-së duket e parandjeu mirë këtë herë. Në intervistën e parë pas zgjedhjeve, në cilësinë edhe të kryeministrit të ri, Edi Rama njoftoi edhe këtë festë, madje bëri të ditur se një ftesë për dy eventet u është dërguar edhe kryeministrit tashmë në detyrë ende, Sali Berisha, dhe aleatëve të tij të së djathtës.
Burimet zyrtare nga Partia Socialiste bënë të ditur dje, se ftesa është dërguar në zyrën e kryetarit të PD-së, Sali Berisha; në adresë të kreut të Frymës së Re Demokratike, Bamir Topi; kreut të Partisë Republikane, Fatmir Mediu. I kontaktuar nga Gazeta, Mediu tha se nuk do të jetë në festë, pasi niset për një aktivitet jashtë vendit. “Sali Berisha, është i ftuar ditën e hënë në festën e Partisë Socialiste që ne kemi shtyrë pas zgjedhjeve dhe nuk diskutohet që kushdo që do ta pasojë do të jetë kryetari i opozitës dhe do të respektohet ashtu siç nuk është respektuar deri më sot. Ftesa për Berishën është bërë, jo vetëm për PD-në, por për gjithë kryetarët e partive të opozitës”, – njoftoi Rama në intervistën e tij të fundit.