Rrëmbyesi i Klivelandit do të deklarohet i pafajshëm

SHBA

Amerikani i akuzuar për burgosjen e tri vajzave për më shumë se një dekadë në shtëpinë e tij në Ohajo do të deklarohet jo fajtor për të gjitha akuzat, thanë avokatët e tij. Ariel Castro, 52 vjeç, akuzohet për katër rrëmbime dhe tri përdhunime. Vajzat u rrëmbyen në kohë të ndryshme dhe u mbajtën në bodrumin e shtëpisë së tij për shumë vite. Njëra prej tyre arriti të largohet këtë muaj dhe dha alarmin.

“Ai nuk është një monstër dhe nuk duhet të dejonizohet”, tha avokati Jaye Schlachet. Ai shtoi se rasti i pafajësisë do të zbulohet ngadalë gjatë gjyqit. Një avokat tjetër i tha medias se klienti i tij e “dashuron shumë” fëmijën që ka me 27-vjeçaren Amanda Berry, një nga tre të rrëmbyerat.

Dy vajzat e tjera të liruara qenë Gina DeJesus, 23 vjeç, dhe Michelle Knight, 32 vjeç. Prokurorët kanë thënë se kanë në plan të kërkojnë akuzë për vrasje të rëndë, akuzë që mund të japë dënim me vdekje. Kjo akuzë lidhet me një abort të detyruar që pësoi një nga viktimat./gazetashqip